लन्डन—गुरू रिन्पोछे दशमीको पावन पुण्य तिथि तथा तमु समुदायको महान् पर्व तमु ल्होछारको अवसरमा बेलायतको रेडिङस्थित बुद्धिष्ट गुम्बामा विशेष धार्मिक तथा सांस्कृतिक कार्यक्रम भव्य रूपमा सम्पन्न भएको छ।
कार्यक्रममा टुल्कु रिन्पोछे, ल्हासे रिन्पोछे, तेन्जिन शोकटुल रिन्पोछेसहित सात जना प्रतिष्ठित धर्मगुरूहरूको सहभागितामा विधिवत् धार्मिक अनुष्ठान सम्पन्न गरिएको थियो। सो अवसरमा गुम्बा परिसरमा गुरू रिन्पोछेको मूर्ति स्थानान्तरण तथा औपचारिक उद्घाटनसमेत गरिएको छ, जसले कार्यक्रममा थप आध्यात्मिक महत्व थपेको सहभागीहरूको भनाइ थियो।
तमु ल्होछारअन्तर्गत सर्प वर्गको बिदाइ तथा घोडा वर्गको आगमनको शुभ अवसर पारेर आयोजना गरिएको कार्यक्रममा बेलायतका विभिन्न स्थानबाट आएका भक्तजनहरूको उल्लेख्य उपस्थिति रहेको थियो। कार्यक्रममा पूजा–पाठ, नडं काटेर चढाउने परम्परागत विधि, भोजन दान, वाडं लगायतका धार्मिक तथा सांस्कृतिक गतिविधिहरू सम्पन्न गरिएका थिए। सातै जना धर्मगुरूहरूबाट ल्होछारको विशेष पूजा सम्पन्न गरिनुका साथै विश्व शान्ति, आपसी सद्भाव र समुदायको कल्याणको कामना गरिएको थियो।
कार्यक्रमको सञ्चालन तमुधिं यूकेका महासचिव कमल गुरुङले गरेका थिए। कार्यक्रममा कार्यवाहक अध्यक्ष कृष्ण गुरुङले स्वागत मन्तव्य दिँदै गुरू रिन्पोछे दशमी र तमु ल्होछारले तमु समुदायको धार्मिक, सांस्कृतिक र सामाजिक पहिचानलाई मजबुत बनाउने उल्लेख गरे। उनले कार्यक्रम सफल बनाउन सहयोग पुर्याउने सम्पूर्ण धर्मगुरू, भक्तजन, स्वयंसेवक तथा संस्थागत प्रतिनिधिहरूप्रति धन्यवाद व्यक्त गरे।
कार्यक्रममा तमुधिं यूकेका अध्यक्ष जुमकाजी गुरुङ, संस्थापक अध्यक्ष मीनप्रसाद गुरुङ, तमु समाज यूकेका अध्यक्ष विन्दु गुरुङ, सहारा यूकेकी अध्यक्ष शारदा गुरुङलगायत विभिन्न संघ–संस्थाका प्रतिनिधि, समाजसेवी, बुद्धिजीवी तथा ठूलो संख्यामा भक्तजनहरूको उपस्थिति रहेको थियो। सहभागी वक्ताहरूले विदेशमा रहँदा पनि आफ्ना मौलिक संस्कृति, भाषा र धर्मको संरक्षण तथा प्रवर्द्धनका लागि यस्ता कार्यक्रमहरू अत्यन्त आवश्यक रहेको धारणा व्यक्त गरेका थिए।
त्यसैगरी, बुद्धिष्ट गुम्बा रेडिङको आमा समूहको सक्रिय पहलमा सम्पूर्ण सहभागीहरूका लागि प्रसादस्वरूप खाजा तथा भोजन निःशुल्क वितरण गरिएको थियो। आमा समूहको व्यवस्थापन र सेवाभावको सबैले प्रशंसा गरेका थिए।
धार्मिक आस्था, सांस्कृतिक एकता र सामुदायिक सद्भावको सन्देश बोकेको उक्त कार्यक्रमले बेलायतस्थित तमु समुदायबीच आपसी सम्बन्ध थप सुदृढ बनाएको सहभागीहरूको प्रतिक्रिया थियो। आयोजकहरूले आगामी दिनमा पनि यस्ता धार्मिक तथा सांस्कृतिक कार्यक्रमलाई निरन्तरता दिने प्रतिबद्धता व्यक्त गरेका छन्।
